香香屁

老早有一对兄弟， 娘死勒早， 屋里无么几搿铜钿， 家产只有一头老黄牛。 搿阿哥生下来就比一般人笨。 乃么弟弟就骗伊讲： “伲娘死脱， 屋里穷勒煞白， 家产分好， 伲个日脚往后要靠自家。” 搿弟弟拿头牛牵出来， 带搿阿哥到牛前头，讲： “喏，阿哥啊，伲现丈家产分好， 后头就勿好再吵相搏， 我是弟弟，让侬阿哥 就拿只老牛； 侬是阿哥，拿只小牛。 小牛力道比老牛壮， 吃勒少，还做勒多。” 搿弟弟骗搿阿哥， 从老牛个身浪 捉下来仔只牛虱， 搿阿哥也勿懂，直当仔是只小牛。 两只手捧拉，就拿伊收好； 搿弟弟就牵勒黄牛跑脱。 搿哥哥走辣路浪， 心里欢喜勒勿得了， 心想再看看只小牛。 结果让只牛虱跳脱， 伊连忙追上去， 勿等伊拿只牛虱捉着， 只牛虱就被邻居个公鸡吃脱。 搿阿哥就坐勒地浪哭煞， “搿是我娘留畀我个小牛啊！” 邻居出来一看， 也没看见啥小牛， 一问才晓得是一只牛虱。 但是搿邻居觉着蛮作孽个，就讲： “勿要哭哉， 我只鸡拿侬个小牛吃脱， 我搿只鸡就畀侬好了。” 搿阿哥就抱仔只鸡， 走过一户人家， 一条狗冲出来 拿只鸡咬死。 搿阿哥又坐了地浪哭， 人家出来一看 条狗咬死仔伊个鸡， 就拿条狗赔畀伊了。 后头搿阿哥带仔条狗 去忒人家耕地， 伊心想，鸡吃仔我个小牛， 条狗又吃仔我个鸡， 干脆让条狗去忒人家耕地试试看。 结果条狗倒真个会得耕地， 耕起来跑勒快嘞 田里被伊耕辣叭叭叭叭像雷响一样。 搿地主看了开心嘞， 畀勒搿阿哥觉怪铜钿。 搿桩事体被搿弟弟听着 就去求搿哥哥拿条狗借伊两天， 搿阿哥个狗到了伊手里 勿晓得为啥就跑勿动了， 搿弟弟急勒讲用鞭子抽， 拿条狗活活抽死脱了。 回去搿弟弟拿条死狗还畀阿哥， 阿哥伤心勒，又无么办法， 只好拿伊埋好。 过仔两天，狗个坟浪窜出来棵树， 上头两只鸟做了個窠， 搿阿哥就上去摸着两個蛋， 烧了吃脱，觉着味道鲜勒勿得了。 才才恁吃下去就斥仔個屁， 吞个吞发现個屁是香个。 伊想想稀奇嘞， 屁还可以是香个。 就立到外头喊： “香香屁，香香屁， 卖香香屁咯。” 有個老太就过来讲： “小伙子，侬个屁真个是香个啊？” 搿哥哥讲：“对个。 我放畀侬看。” 搿老太买仔一只屁， 搿阿哥就吃個蛋，当场放出来個， 個老太吞着香勒像是升仙一样。 付了搿阿哥觉怪钞票。 搿弟弟晓得仔也去问個哥哥讨着搿蛋， 伊也吃下去，到外头去卖， “香香屁，香香屁， 卖香香屁咯！” 还是搿老太过来买仔一只， 乃搿弟弟吃仔蛋斥出来個黑颜色个屁， 臭得来拿個老太当场臭死脱了。 老太个两个儿子就拿搿弟弟的脚打断， 打勒伊只好趴勒地浪，拿自家拖回去， 刚到仔伊屋里向就死了。 *想起来小时候听外婆讲的这个故事。也是外婆唯一会讲的故事。于是用沪语写下来了。不能说有多么好吧。但就当做个记录。