十六暝晡煙共花

正月十六暝晡，我共行李搬轉宿舍。宿舍固無別儂，我整理完，自家出門，去食日本菜。

經過旁邊其村，巷巷盡窄。厝裏捅出棍棍，野像會敲響對面檻門囝其玻璃。遐辰候天暗無偌𣆯，前兜俤蜀隻丈夫囝蒂甩了摔炮，嘻嘻笑䟛去。只爿伲囝哥掏𡅏㲺㲺花，邊兜儂圍蜀環相。盡価厝門兜放了盆盆，盆盆貯了土，插了有碗許蠻大其香燒，煙噗囫圇巷巷都是。只大其香，以前㑚敆廟門兜看見過。

行去仂𣆯，安靜仂囝，含不蜀時聽見倏其蜀聲。頭𩓥起去罔覷，是煙花趁這窄窄密密其柴欄厝臺中飛上天空，綻放開去。蜀菩蜀菩，照𡅏地兜暗囇光囇。

蜀墿其煙，滿天其花，我印象臺中做細乍看見過。

18年5月23號暝晡寫，今旦改了仂囝

Ciáng-nguŏk sĕk-lĕ̤k màng-buŏ, nguāi gáe̤h hèng-lī buăng diōng sé̤ṳk-siá. Sé̤ṳk-siá gó mò̤ biék-nè̤ng, nguāi cīng-lī uòng, cê-gă chók-muòng, kó̤ siăh Nĭk-buōng-chái.

Gĭng-guó bòng-biĕng gì chŏng, háe̤ng-háe̤ng cêng cáh. Chió-diē tē̤ng chók góng-góng, iā chiông â̤ kiĕu-hiōng dó̤i-méng kāng-muòng-giāng gì bŏ̤-liè. Hiā sèng-hâiu tiĕng áng mò̤ nióh-òng, sèng-dău diê siŏh-ciáh dòng-buŏ-giāng-dé sáe̤k lāu sáe̤k-páu, hĭ-hĭ-chéu bié kó̤. Cī-bèng niè-giāng-gŏ̤ dò̤ lā̤ chék-chék-huă, biĕng-dău nè̤ng ùi siŏh kuàng sióng. Cêng sâ̤ chió muòng-dău bóng lāu buòng-buòng, buòng-buòng diō lāu tū, chák lāu ô uāng hī-màng duâi gì hiŏng siĕu, ĭng bŭk gó̤-lòng háe̤ng-háe̤ng dŭ-sê. Cī duâi gì hiŏng, ī-sèng nâgăk miêu muòng-dău káng-giéng guó.

Giàng kó̤ nék-òng, ăng-cêng nék-giāng, hàng-bók-siŏh-sì tiăng-giéng sé̤k gì siŏh-siăng. Tàu ngiăk-kī kó̤ muōng ché̤ṳ, sê iĕng-huă téng ciā cáh-cáh-mĭk-mĭk gì chà-làng-chió dài-dŏng buŏi-siông tiĕng-kŏng, déng-huóng kŭi kó̤. Siŏh-biò siŏh-biò, ciéu lā̤ diê-dău áng lâ guŏng lâ.

Siŏh-diô gì ĭng, muāng-tiĕng gì huă, nguāi éng-chiông dài-dŏng có̤-sá̤ cá káng-giéng guó.

18 n. 5 ng. 23 h. màng-buō siā, gĭng-dáng gāi lāu nék-giāng