潮汕歌曲【銅山姿娘】

二九暝團圓飯食飽了後，電視拍--開tsun7無一台想欲看，佮厝--裡的儂閣無啥話通講，姑不而章揣寡代誌來做議量，罔寫日記渡時間…。
潮州歌曲【東山姿娘】
http://v.youku.com/v_show/id_XNDY4NTYyMDY0.html
這个影片的尾仔有提起講Tang5-Suann1就是福建東山縣，若按呢，原歌名「銅山姿娘」拍算是著寫做「東山姿娘」。(銅、東無仝聲調，毋過讀音相siang5)
這塊民謠的歌詞我會當掠一个大概，雖罔講潮州話佮閩南話的差別誠大，潮州儂拄著閩南儂話語無一定會通，毋過這內底有幾若句歌詞讀音是佮閩南話相siang5或者是相倚，對福建閩南儂也好台灣儂也好，若有看過歌詞，聽幾遍了後，欲唱這塊歌毋是真困難的代誌，親像我就是按呢，歌加放幾遍--仔，聽咧聽咧就學會曉，三不五時洗身軀的時就那唱這塊歌。
「姿娘」台灣、漳州敢若無這款講法，泉州有个所在佮潮州有咧講，咱儂話較捷講做查某。既然歌名有兩字是姿娘，所致這塊歌主要著是欲講查某，紲落來著欲講著這句歌詞：「一家頭喙我共你守，做你去啊」，這款會曉扞家的查某儂就是咱心目中理想的對象，查埔儂揀某無一定著愛揀媠的，若是彼號真正gau5揀的，的確是欲揀彼款會共咱幫贈的。
歌詞的意境、溫柔的姑娘仔聲、古樂器的演奏，這幾个要素鬥鬥起來，真正是上正(tsiunn7-tsiann3)無地嫌。