写俾深圳嘅打工仔 - 供楼VS租房

我来深圳读书做嘢唔经唔觉已经快8年喽，除咗有份稳定，收入过得去嘅工，我一无所有，最近我买咗楼，借咗好多钱交首期，月供嘅。 买楼前后，我谂咗好多嘢，回想起以前，感慨万千，所以想将我嘅经历写出嚟，俾同我一样响深圳打工嘅打工仔睇。 我嚟深圳时，人工好抵，同一班朋友合租，算系够食够住够用，都会摞D钱翻屋企，冇乜钱静。 03-04年左右，确实时间唔记得好清楚了，经过彩田路，见到好大个广告牌，单身公寓0首，月供800，估计20几万就搞掂。当时我仲谂，单身公寓买嚟做乜，有钱，起码都要两房一厅啦，当时静系谂到人工会升，冇谂过楼价会升，而且当时人工得2000蚊左右，要供咁多年，觉得压力大，买楼系好遥远嘅事。等揾到钱先算啦。 宜家听讲噶边单身公寓可以租到1800喽，市区都要过万一方，彩田路，仲系03-04嘅楼，估计都要万三四，单身公寓估计市值40万以上。晕，我宜家买大芬二手小两房，31万5，如果当时买咗，卖出去，应该够买断层楼仲有找，买断小三房都得喽。使宜家先开始供？真系慢长喽。 所以我买楼都简地铁口，地铁开通，到东门15分钟，小区环境，周边发展都好好嘅地方买，等升值嘛。 朋友同我差唔多时间嚟深圳，都系打工仔，虽然两公婆一齐揾钱，不过都係工薪阶层。佢哋05年9月买咗楼，罗湖嘅，50万，交咗10万首期，当时又叫过我买，不过我当时选择去东门开铺头，结果泄咗好多钱。朋友今年卖出去100万，供咗3年几，我晕。换咗新楼，准备买车添。佢话如果唔係当时买咗层楼，都係打工仔，边换得起喽？边有机会买车？劳心劳力，结果得个吉，仲泄钱，唔使谂嘢，供下楼，结果换新楼，买车。投资失败，我冇嘢好讲喽。 我见证深圳市区由几千蚊升到万几蚊，听讲宜家仲有4万一方嘅楼，我顶。做生意、买股票有风险，打工冇大钱揾，只有买楼先会稳赚。 如果收入稳定，可以筹到首期，对买楼，又嫌贵，想佢跌，心大心细嘅打工仔，我建议你去买啦。我响深圳8年，事实证明越早买越平，越迟买越贵，当时买都係觉得贵，过几年一睇，都觉得早几年买就好，好抵。你哋唔好睇非典时跌得惨，08年底，09年初嘅回落，总体都係升。我上网查过，深圳7年间嘅人均收入大概升咗100%左右，楼价大概就升咗300%，我顶，真係坐火箭都追唔上。 换个角度，我租咗7-8年房，交租都交咗最少5-6万，如果我一开始就买咗楼（当然冇可能，只係比喻），哩5-6万就係自己嘅，卖咗层楼都可以摞翻啦，使交俾房东，帮佢打工？ 前两日睇新闻，中国嘅经济增长，4%-8%，我冇具体睇，知道中国係有增长嘅，宜家息口抵，首期抵，会多人买得起楼，就会多人买咗，升紧，个个礼拜唔同价，虽然有中介嘅水份，不过事实比几个月前生咗1～2成啦。地铁3号线，2011开通（听讲赶工2010开通，未经证实），3号线沿线嘅楼，越近地铁开通楼只会越贵，通咗就唔使讲啦，接近市区啦。有人会谂，再贵落去，会有人买么？我理解就係如果经济不断发展增长嘅讲，会，你哋睇下HK，6000几一尺（唔係一方喔），都有人买。长远嚟讲，一定会升。 短期嚟讲，已经升紧啦，近期股市又向好，股市好，楼市就好，记得今年3月开始睇楼时，地产公司都要打6折佣金，宜家边有哩条数睇？唯一影响嘅係哩期猪流感，如果有沙士咁劲，楼价实跌，不过噶时社会咁唔稳定，个个都想走佬，你份工都可能唔稳定，你仲敢买楼咩？ 如果可以用当供楼係存钱嘅谂法去供，以后卖咗，就算唔升值，都可以摞翻老本啦，升咗咪赚喽，交租，一交就冇噶，咁谂可能可以接受D。中国人，都係想有个家，过一世租房嘅日子，我觉得冇可能，人老咗，边有能力交租。好多人又谂，嚟深圳係打工揾钱嘅，又唔係过世，买楼都响屋企买喽。我觉得如果你咁谂就大差特错啦，我都曾经咁谂过，不过最近谂通咗。如果你响屋企买楼，你响深圳打工有5年，10年，20年...你翻到去，层楼都旧啦，可能到时你都唔想要喽。如果你开始响深圳买，到走噶时卖咗佢，赚咗钱，翻去买别墅都得啦，老家D楼，有深圳嘅升得快么？有深圳嘅价钱高么？ 因为我都觉得楼价係好高，哩个都係今日价，几年之后，可能你又会觉得好抵喽，8年啦，我睇化喽，就算有小波动，我觉得都冇可能回落到几年前嘅价位。正常推论係咁，咁一定有例外嘎，如果第三次世界大战，深圳係战区，送层楼俾你都唔住啦。仲有好多其他因素，冇人可以预测，不过我相信世界经济，中国经济係向前发展，各国政府都係咁希望，为哩个目标而努力喽。咁佢哋都搞唔掂，控制唔到，经济转差，楼价大跌，就冇办法喽。经济好，股市楼市都会好，哩个係必然噶。 总结： 买楼=存钱，层楼升值=赚钱，唔使交租=悭钱，住得舒适D，地铁通咗，上班方便D，可以买钟意嘅嘢用...着数一大堆... 1. 供楼虽然係辛苦，咁就係当存钱喽。 2. 租房就係帮房东打工，不如供房帮自己打工。 3. 回顾深圳人均收入增长同楼价增长，差3倍，唔係3蚊喔。 4. 宜家楼价升紧，想买就快D出手啦，就算会跌，都係小波动，你把握唔到，又咪得个吉。 5. 有自己屋，买好家私电器，享受下，人生匆匆几十年，出嚟打工咁辛苦，又係最风光嘅年纪，唔去享受下，到老就会后悔。 6. 唔会怀念以前楼价低，你要知道今日嘅高价，就係几年后你怀念嘅低价。 哈哈～道理人人都识讲，不过我都係讲出我嘅经历同睇法啫。只供参考，大家都係要量力而为，份工要稳定，月供唔好超过收入嘅1/3，筹到首期嘅钱，选地点要有升值空间（如准备开通嘅地铁口物业），交通，环境，楼层，户型 ，采光，新旧...各方面都要考虑到，不过我觉得就算买地铁口一房一厅，或者单房，月供几百到千几，都比租房强，可能哩个就係当年我睇唔起彩田路单身公寓嘅翻版篇了。呵呵～你哋细心考虑下啦。 谂好点摆嘢喽，呵呵～虽然水平有限，整几张图出嚟TT好唔好先～