《行》
行（1~6 完结）
2012-08-20 12:36:23
文／痟婆仔
1
阿婧坐咧坐盆四界相，洗水台的玻璃壶迄枞番芋箬障仔发都但四箬尔，无彩焕有顾。阿婧越头看涂骹，“一、二、三、四”佫看乱去，佫过数，“一、二、三、四、五、六……”阿婧目睭盯咧涂骹的钢砖，反来反去直直数袂煞。洗身间通盘犹无十平方米，伊逐帮上厕所，就一定坐咧坐盆顶头数涂骹砖数袂煞。阿婧知影家已是着着一款号做“强迫症”的病，毋久就是袂改。从做囡仔开始，伊就按呢看着铺咧涂骹的砖就数。所以，伊从来毋敢穿条纹的抑是孔（khang2）仔的衫裤，惊家已一日仔会数到起痟。就若亲像初中逐日昼坫咧学堂食的迄暂仔。
阿婧的位置靠操场迄爿的窗仔。逐日日昼食了，阿婧会揭一本琼瑶的小说坐咧位置咧静静仔看。有时仔看到神魂毋知走去佗，一字拢无看落去，伊会扌举头看窗仔外口。图书楼门口的迄枞榕树籽交落到规涂骹，传侬踏到一迹一迹乌乌汁汁，看了诚袂爽神。日昼中午，正对窗仔的足球场无半仙侬。但看着远远的清源山顶，电视台迄支大天线。阿婧手托咧下颔，看到神去。一日、两日、三日……，阿婧一日比一日较毋爱说话，一日比一日心情较歹。到底是酵代，阿婧也毋知影。
阿婧头壳摇摇，侬缀徛起来，水转头开开，据在喷头的水冲（tshiang5）到规头规身。
２
电视报今仔有风台。暗晡，阿练敽阿婧相招，透雨去田里挽菜豆敽涂豆，两个沃到规头规身澹漉漉，涂糜膏擂甲一身，掣(tshuah)涂豆的时阵喷到身顶的白纱衫一点一点计涂。阿婧的浅拖牢甲计涂糜，拢有规斤重。阿练看阿婧位田里行甲卜跙（tshu6）倒，赶紧喊阿婧褪赤骹咧行。阿婧褪赤骹 蹑蹑骹踏咧涂里甲啁咧啁咧，涂糜位阿婧的指头仔缝里喌(tsiuh)出来，阿婧感觉诚好笑。伊已经诚久无按呢拙欢喜啰。
说卜风台，事实但霎霎仔雨尔。铝合金窗头前迄两枞芭蕉箬传雨沃甲沙沙吼。
阿婧洗身洗头了，换一领白洋装短裤敽浅蓝的纱衫，徛咧窗仔头前捋头毛。头毛已经诚久无铰，长甲到腰咧啰。毋久，拙久诚有落头毛。逐日扫涂骹的时阵，阿婧会想说毋知底时家已的头毛会落了了变磅灯袂。
阿练[卧虎](the)咧沙发看电视 ，那食昨暝买的迄半粒食偆的西瓜。用汤匙搤甲一空一空的西瓜若亲像隔壁乡里迄个老阿伯的迄半粒侬头尔。阿婧目睭盯咧西瓜，乌白枋翻头走去跍咧厕所里吐。
已经过去焕济年啰，阿婧犹是会记得，倒咧涂方车车轮边头的迄个老阿伯，敽迄粒乞车舂着喷到规车路的粉红色的西瓜头。
３
“妈仔，我等咧卜共阿婴抱出来曝日。汝等咧则共床咧的棉绩揭出来曝日一下乎。 ”
“哦，棉绩卜曝日哦。”
“嗯。较等一下乎。等我共阿婴抱出来咧。”阿婧说了越头将乌篮扛出来祀咧砛墘，翻头卜行去房里卜抱阿婴，扌举头看着大家捀一领棉绩位房里行出来。
“阿婴呢？”
“啥啊？”
“阿婴呢？阿婴倒咧床里呐，汝无看着？”
“呵呵，无啊。毋是伫乌篮里？”
“汝偂做汝共被挔（hiannh）出来？”阿婧说甲卜哭出来，赶紧冲入去房里。四骹亭的床顶头无半侬，阿婴倒咧涂骹，无做无声。
“爸仔爸仔，紧来啊！阿婴交落落来床骹啰！爸仔啊……呜呜呜……”
阿婧跪咧涂骹，轻轻仔共阿婴弧（oo5）咧心肝头，哭甲活卜摕去。
“妹仔，醒一下。唉，佫陷眠啰。”阿萍坐咧阿婧床头，轻轻仔共阿婧摇醒。阿婧迷迷仔目睭裭开，枕头巾澹一角，若亲像开一蕊花。
“嫂仔，我佫看着阿婴啰……”
“嗯。”
４
日头耀咧窗仔墘。窗仔外口，昨暝雨水洗过骹的芭蕉箬，若水袖缀风摇曳。吊顶的大灯规暝点到光。阿婧翻身手伸去床头将电火禁熄。
“嬷仔，我倒来啰。”“婧啊，汝今仔有去帝爷公点香无？迄个囡仔定定缀咧汝后巴脊。唉，可怜代啊！汝嘛冗早去点香咧……”阿婧目眉小微一下，越头看家已后巴脊一下，翻头冲入去房里，将门反锁咧，规仙侬掷（tan3）咧床里，被搝（khiu2）起来将头罩密密。偆引嬷家已一侬伫厅里sauh8-sauh8唸。
诚吵，是孰何伫房里走来走去？诚密捷、褪赤骹的骹步声，几偌个的款，涂骹乞亻因走甲pong-pong吼。到底是谁？哇！身躯顶是啥乜？酵拙重，硩甲规仙侬袂振动，心脏诚疼。门窗计关关咧，无开门关门的声说，到底是孰何伫房里？毋通动我，毋通行来我边头，毋通来，毋通过来，出去出去……
将被角搝（khiu2）甲絙絙的手揤咧抖，规仙侬罩咧被腹毋通振动也毋通吐气。沓沓仔、沓沓仔骹步声愈来愈细声去，身躯顶头也加诚轻去啰。阿婧吐一个大气， 匀匀仔从被腹囵（lun）出来。无月的暗暝，规内暗摸摸，但有窗仔外口的树影乞风煽甲乱厾乱摇。
阿婧足百起来，开灯，乞惊着，戆戆坐伫床咧前相后相，床头手机捎过来看一下，则四点尔。头先到底是酵？从来毋捌按呢的啊！是陷眠？抑是拄着鬼？阿婧毋敢佫困。绁手将床头的困裙拖来囊咧身顶。落床，开电脑上网！侬若衰，放屁都会弹死鸡！宽带障死都袂上咧起去！阿婧［卧虎］（the）咧藤椅里，掠面头前的屏幕看甲神去。空调风吹来甲寒寒，阿婧仙仙足百起来，位衫橱摕一领对襟的羊毛衫幔咧了还the咧藤椅里。侬诚仙诚厌，佫毋敢困落去。宽带佫连接，犹是袂咧起去。阿婧位茶色玻璃电脑桌看着托咧桌头的家已，比鬼佫较惊死侬！鬖（sam3）落来的头毛七翀（tshang3）八翀（tshang3），大母蕊的目睭甲吐吐，无神无彩，戆神戆神，一支面无半丝仔表情！阿婧足百起来行去坐咧床里，手抱骹腿，头覆咧骹头趺顶头，目屎挡袂牢澹到规个被角。
５
“驶恁娘的！啥乜代志计着我来！昨日随买来的电视，今仔就共恁父创歹！恁咧创啥潲啊？XXX……”店头家拖一双浅拖位内面那肏（tshoh）那幹出来。
头家娘惦惦伫灶骹里截菜。
阿婧目眉小微一下，无做声，也无举头，做伊头覆覆食饮糜。店里但阿婧一个侬客。店头家徛咧门头鼿（puh）薰。“昨暝拍去怀猪骹好食毋？”阿婧喙角小振动一下，无做声。“酵啊？今仔面色拙歹看！侬咧毋快活？”“无。”阿婧文文笑一下，汤匙舌斗糜细细吮。
阿婧抓（liau7）去五骹架水弧（oo5）的洗衫枋顶头坐咧看天星。“妈妈，等好！”“阿婴，来！妈妈伫即位等汝！来，过来，阿婴诚勇敢的！”沓沓仔，大块的云散去雾去，“妈妈妈妈，汝伫佗？我看无汝！妈妈……”
乌白枋西北雨诚大泼落来，五骹架的桌仔顶头是拍包来的咸饭、猪骹敽糋虾。阿伦食饱了佫走去厅里看伊的囡仔片。楼骹球场静嘁嘁，拍球的囡仔计倒去食。阿婧从水弧跳落来，无啥爱食，共物配收收去灶骹囥咧，偂行去倒咧阿伦边头的沙发椅，做阵看囡仔片。
外口风夹雨，雨愈落愈大。有龙眼树枝稿折落来的声说。玻璃柴窗无峇，风钻入来，共下咧房桌的蜡烛火煽甲强卜熄去。“嘉庆，会要紧袂？汝看厝顶怀瓦片（pherh）若亲像卜落落来尔。”“袂要紧啦！若落落来，硩死我嘛袂硩死汝！”“呸呸呸，汝迄支喙哦！”“哈哈哈，袂啦！袂酵啦！今仔落雨秋凊天，拄好较好眠！无顶几日强卜热死！来哦，毋通七看八看，七想八想哦！蜡烛火歕熄通睏啰！”阿婧倒咧眠床顶，诚斟酌听外口的风雨声。嘉庆话说了无两秒钟已经鼾（huann5）甲大母细声。日时做穑伤碌，侬易厌仙。阿婧惦惦仔，看玻璃天窗的水流，看椽仔角枝传湿入来的雨水浸甲计澹去。厝顶迄逝小含脩（sau）的瓦片，雨水湿落来，嘀嘀嗒嗒（tauh8-tauh8）滴咧承水的面桶里。逐摆落雨，规厝内就咧排面桶阵！起厝的申请拍去偌久，就是毋批出来！便落雨，阿婧一粒心就捾咧，食袂落，睏袂落。
"呯……"
“庆啊！阿婧啊！恁嘛好侬好侬，应一声哦！毋通惊死阮哦！我苦啊！救侬哦！我苦啊……”“际卜障仔办啊？我苦啊！”“老查某啊，汝紧去叫厝边来相共搤！紧咧，紧去！雨衫幔去！”“嗯，我去。老的，汝家着较细腻！我苦啊……”两个老岁仔目屎流目屎滴一个那咧搤塗，一个那位外口行去。
古大厝靠路头即爿的大房厝瓦、椽仔角枝、塗渣，一堆诚悬。老岁仔家一个侬，大下 细下用手耙塗。毋敢用锄头，惊伤着侬。一久仔，厝边头尾计来斗相共，有气力的相斗搤侬，先生侬联系救护车，街政委员赶紧拍电话报街长知。“共恁说无，早着批传侬起啰，恁毋。际出代志看恁卜障办？”老岁仔惊心一下佫有岁咧，骹计软落去，坐咧厝埕石砛鼿（puh）薰，一双手揤咧抖。老查某传厝边老姆牵咧，徛咧塗堆边仔喊。
阿婧先搤出来，手敽肋骨计折，好得伊手骨位面遮咧，鼻、喙窒较少塗。嘉庆搤出来的时阵已经直马马啰，规喙规鼻窒甲滇滇的塗糜膏，规身的骨头佫较免说啰。
……
“姑啊，姑啊，汝咧酵？”“姑啊，醒一下！”阿婧目睭裭开，“姑啊，汝卜惊死侬啰！”阿伦提面纸共阿婧面咧的目屎拭捒：“姑啊，毋通吼啰。”阿婧面挲一下，举头戆戆看厝顶，厝顶有一条幼幼的裂痕，正对沙发椅顶。
外口雨犹咧落……
6
阿婧穿一领浅蓝色纱质吊带衫连裙the咧房里的摇椅顶头轻轻仔摇，白色的百叶窗外口，几偌只雀仔伫云杉树顶浞（tshiok8）来浞去，柴桌顶头的收音机放的是江蕙的《家后》。厅里，萍仔嫂一括姊妹伴来厝内煮食化仙。阿婧覕咧房里听亻因标甲大母细声，就是毋爱出去敽亻因交陪。说毋捌亻因也毋是。萍仔嫂嫁来的时阵，阿婧犹咧读初中尔，伊即括姊妹伴经常来厝内佚佗，说来嘛是看家已大汉的，特别是迄个清芬姊诚疼家已的。毋久家已为啥乜就是毋爱出去敽亻因做阵化仙讲古？为啥乜家已无半个啥乜话计说的姊妹伴？是家已较孤死霜？阿婧但知影，佫较天大的代志，家已嘛囥咧，目屎吞落腹，也袂去共别侬说。想到即位，阿婧足百起来，褪赤骹行去徛咧窗仔骹。衫连裙伤长，差一丝仔拖咧塗骹。
“阿婧啊，水煮活鱼熟啰，出来食哦！”是清芬姊咧喊！阿婧揞（ann3）落去裙骹搝起来，赶紧跳起去摇椅，巴脊向门，目睭瞌瞌倒咧。
“硞硞硞……”“阿婧啊，出来食哦！”
“无做声？敢是咧睏？”
“汝共鱼贮起来，我入去看觅咧。”
阿萍轻轻仔将房门捒开，看阿婧倒咧摇椅顶头，越头共房门㧁（khah）咧，行到阿婧后壁，伸手共阿婧头壳捋一下：“阿婧，起来，通出去食！”阿婧翻头：“阿嫂，我毋爱食！”“毋食袂做得。佫较障仔，路嘛着照行，糜（mai）嘛着照食！乖，起来，头毛捋捋咧。”
阿萍共阿婧梳一个髻，佫位桌头的白瓷碟仔里摕两蕊天光早位楼骹挽的鸡卵花插咧阿婧髻里，鸡卵花的鹅黄配长裙的蓝，诚媠诚醒喙。阿萍看甲诚合意，共阿婧面挲一下：“阮阿婧就是媠！行，出来去！”
“来来来，趁烧紧来食！凊就无好食啰！”清芬姊无闲嘁嘁，赶紧共阿婧捀碗揭箸：“内面诚济菜咧，着夹起来食！”阿婧笑笑当做应伊。
侬伤济，逐个偂坐坐咧塗骹，围咧茶桌食。“妈妈啊，阿婧姨姨的裙仔诚媠哦，我也卜挃。”少红的查某仔成十岁额，已经大到若少女尔啰，铰一个童发头，诚清气相诚古锥。迄个无去的若犹伫咧，嘛有即个岁啰。阿婧想到即，目屎煞挡袂牢流落来。“阿婧，酵代啊？”“无啦！鱼伤辣啦！歹势。”阿婧笑笑，摕面纸将目屎拭捒。
海骹的暗时，风微微仔吹来，澹澹佫臭臊。阿婧头毛放落来，穿嘉庆早时买的迄领白色带绿色碎花吊带长纱裙the咧客栈二楼五骹架的交椅里。桌仔顶头白瓷杯内面几箬仔绿茶浮咧沉咧。客栈的音箱咧放《永远追随》。
嘉庆过身后，阿婧出院了偂搬倒来外家厝蹛，规日覕咧房里毋爱见侬。厝内的代志计阿兄去发落。厝倒了，袂蹛咧，本在卜共公婆接来外家厝蹛，毋久老岁仔毋爱，惊麻烦阿婧外家厝的侬，说凊采蹛咧厝边就好。阿练就近租一位所在传两个老岁仔蹛，三不五时买一下欠用的物件过去看亻因。起厝的代，着等嘉庆三年过了则会做动土得！所以，到今也则起一个框架尔。阿练叫阿婧免烦恼拽代志，好好位厝内养身体就好。起厝的代志伊去发落就会做得啰。
身体好交囵了，诚久无出来行行咧啰。
透早起来，阿婧共阿萍说伊卜出去几日，四界行行云云咧。阿萍欢喜甲，说好！阿婧换一身白纱衫佮蓝色长牛仔裙、白球鞋，昨暝抾好的衫裤物件捾咧，去动车站坐车。“放较宽心咧！佫较艰苦，路咱嘛着继续行落去……”阿婧想着阿萍临卜行对伊说的话，笑笑，对路头行去，愈行愈远……
2012-08-20 12:36:23
文／痟婆仔
1
阿婧坐咧坐盆四界相，洗水台的玻璃壶迄枞番芋箬障仔发都但四箬尔，无彩焕有顾。阿婧越头看涂骹，“一、二、三、四”佫看乱去，佫过数，“一、二、三、四、五、六……”阿婧目睭盯咧涂骹的钢砖，反来反去直直数袂煞。洗身间通盘犹无十平方米，伊逐帮上厕所，就一定坐咧坐盆顶头数涂骹砖数袂煞。阿婧知影家已是着着一款号做“强迫症”的病，毋久就是袂改。从做囡仔开始，伊就按呢看着铺咧涂骹的砖就数。所以，伊从来毋敢穿条纹的抑是孔（khang2）仔的衫裤，惊家已一日仔会数到起痟。就若亲像初中逐日昼坫咧学堂食的迄暂仔。
阿婧的位置靠操场迄爿的窗仔。逐日日昼食了，阿婧会揭一本琼瑶的小说坐咧位置咧静静仔看。有时仔看到神魂毋知走去佗，一字拢无看落去，伊会扌举头看窗仔外口。图书楼门口的迄枞榕树籽交落到规涂骹，传侬踏到一迹一迹乌乌汁汁，看了诚袂爽神。日昼中午，正对窗仔的足球场无半仙侬。但看着远远的清源山顶，电视台迄支大天线。阿婧手托咧下颔，看到神去。一日、两日、三日……，阿婧一日比一日较毋爱说话，一日比一日心情较歹。到底是酵代，阿婧也毋知影。
阿婧头壳摇摇，侬缀徛起来，水转头开开，据在喷头的水冲（tshiang5）到规头规身。
２
电视报今仔有风台。暗晡，阿练敽阿婧相招，透雨去田里挽菜豆敽涂豆，两个沃到规头规身澹漉漉，涂糜膏擂甲一身，掣(tshuah)涂豆的时阵喷到身顶的白纱衫一点一点计涂。阿婧的浅拖牢甲计涂糜，拢有规斤重。阿练看阿婧位田里行甲卜跙（tshu6）倒，赶紧喊阿婧褪赤骹咧行。阿婧褪赤骹 蹑蹑骹踏咧涂里甲啁咧啁咧，涂糜位阿婧的指头仔缝里喌(tsiuh)出来，阿婧感觉诚好笑。伊已经诚久无按呢拙欢喜啰。
说卜风台，事实但霎霎仔雨尔。铝合金窗头前迄两枞芭蕉箬传雨沃甲沙沙吼。
阿婧洗身洗头了，换一领白洋装短裤敽浅蓝的纱衫，徛咧窗仔头前捋头毛。头毛已经诚久无铰，长甲到腰咧啰。毋久，拙久诚有落头毛。逐日扫涂骹的时阵，阿婧会想说毋知底时家已的头毛会落了了变磅灯袂。
阿练[卧虎](the)咧沙发看电视 ，那食昨暝买的迄半粒食偆的西瓜。用汤匙搤甲一空一空的西瓜若亲像隔壁乡里迄个老阿伯的迄半粒侬头尔。阿婧目睭盯咧西瓜，乌白枋翻头走去跍咧厕所里吐。
已经过去焕济年啰，阿婧犹是会记得，倒咧涂方车车轮边头的迄个老阿伯，敽迄粒乞车舂着喷到规车路的粉红色的西瓜头。
３
“妈仔，我等咧卜共阿婴抱出来曝日。汝等咧则共床咧的棉绩揭出来曝日一下乎。 ”
“哦，棉绩卜曝日哦。”
“嗯。较等一下乎。等我共阿婴抱出来咧。”阿婧说了越头将乌篮扛出来祀咧砛墘，翻头卜行去房里卜抱阿婴，扌举头看着大家捀一领棉绩位房里行出来。
“阿婴呢？”
“啥啊？”
“阿婴呢？阿婴倒咧床里呐，汝无看着？”
“呵呵，无啊。毋是伫乌篮里？”
“汝偂做汝共被挔（hiannh）出来？”阿婧说甲卜哭出来，赶紧冲入去房里。四骹亭的床顶头无半侬，阿婴倒咧涂骹，无做无声。
“爸仔爸仔，紧来啊！阿婴交落落来床骹啰！爸仔啊……呜呜呜……”
阿婧跪咧涂骹，轻轻仔共阿婴弧（oo5）咧心肝头，哭甲活卜摕去。
“妹仔，醒一下。唉，佫陷眠啰。”阿萍坐咧阿婧床头，轻轻仔共阿婧摇醒。阿婧迷迷仔目睭裭开，枕头巾澹一角，若亲像开一蕊花。
“嫂仔，我佫看着阿婴啰……”
“嗯。”
４
日头耀咧窗仔墘。窗仔外口，昨暝雨水洗过骹的芭蕉箬，若水袖缀风摇曳。吊顶的大灯规暝点到光。阿婧翻身手伸去床头将电火禁熄。
“嬷仔，我倒来啰。”“婧啊，汝今仔有去帝爷公点香无？迄个囡仔定定缀咧汝后巴脊。唉，可怜代啊！汝嘛冗早去点香咧……”阿婧目眉小微一下，越头看家已后巴脊一下，翻头冲入去房里，将门反锁咧，规仙侬掷（tan3）咧床里，被搝（khiu2）起来将头罩密密。偆引嬷家已一侬伫厅里sauh8-sauh8唸。
诚吵，是孰何伫房里走来走去？诚密捷、褪赤骹的骹步声，几偌个的款，涂骹乞亻因走甲pong-pong吼。到底是谁？哇！身躯顶是啥乜？酵拙重，硩甲规仙侬袂振动，心脏诚疼。门窗计关关咧，无开门关门的声说，到底是孰何伫房里？毋通动我，毋通行来我边头，毋通来，毋通过来，出去出去……
将被角搝（khiu2）甲絙絙的手揤咧抖，规仙侬罩咧被腹毋通振动也毋通吐气。沓沓仔、沓沓仔骹步声愈来愈细声去，身躯顶头也加诚轻去啰。阿婧吐一个大气， 匀匀仔从被腹囵（lun）出来。无月的暗暝，规内暗摸摸，但有窗仔外口的树影乞风煽甲乱厾乱摇。
阿婧足百起来，开灯，乞惊着，戆戆坐伫床咧前相后相，床头手机捎过来看一下，则四点尔。头先到底是酵？从来毋捌按呢的啊！是陷眠？抑是拄着鬼？阿婧毋敢佫困。绁手将床头的困裙拖来囊咧身顶。落床，开电脑上网！侬若衰，放屁都会弹死鸡！宽带障死都袂上咧起去！阿婧［卧虎］（the）咧藤椅里，掠面头前的屏幕看甲神去。空调风吹来甲寒寒，阿婧仙仙足百起来，位衫橱摕一领对襟的羊毛衫幔咧了还the咧藤椅里。侬诚仙诚厌，佫毋敢困落去。宽带佫连接，犹是袂咧起去。阿婧位茶色玻璃电脑桌看着托咧桌头的家已，比鬼佫较惊死侬！鬖（sam3）落来的头毛七翀（tshang3）八翀（tshang3），大母蕊的目睭甲吐吐，无神无彩，戆神戆神，一支面无半丝仔表情！阿婧足百起来行去坐咧床里，手抱骹腿，头覆咧骹头趺顶头，目屎挡袂牢澹到规个被角。
５
“驶恁娘的！啥乜代志计着我来！昨日随买来的电视，今仔就共恁父创歹！恁咧创啥潲啊？XXX……”店头家拖一双浅拖位内面那肏（tshoh）那幹出来。
头家娘惦惦伫灶骹里截菜。
阿婧目眉小微一下，无做声，也无举头，做伊头覆覆食饮糜。店里但阿婧一个侬客。店头家徛咧门头鼿（puh）薰。“昨暝拍去怀猪骹好食毋？”阿婧喙角小振动一下，无做声。“酵啊？今仔面色拙歹看！侬咧毋快活？”“无。”阿婧文文笑一下，汤匙舌斗糜细细吮。
阿婧抓（liau7）去五骹架水弧（oo5）的洗衫枋顶头坐咧看天星。“妈妈，等好！”“阿婴，来！妈妈伫即位等汝！来，过来，阿婴诚勇敢的！”沓沓仔，大块的云散去雾去，“妈妈妈妈，汝伫佗？我看无汝！妈妈……”
乌白枋西北雨诚大泼落来，五骹架的桌仔顶头是拍包来的咸饭、猪骹敽糋虾。阿伦食饱了佫走去厅里看伊的囡仔片。楼骹球场静嘁嘁，拍球的囡仔计倒去食。阿婧从水弧跳落来，无啥爱食，共物配收收去灶骹囥咧，偂行去倒咧阿伦边头的沙发椅，做阵看囡仔片。
外口风夹雨，雨愈落愈大。有龙眼树枝稿折落来的声说。玻璃柴窗无峇，风钻入来，共下咧房桌的蜡烛火煽甲强卜熄去。“嘉庆，会要紧袂？汝看厝顶怀瓦片（pherh）若亲像卜落落来尔。”“袂要紧啦！若落落来，硩死我嘛袂硩死汝！”“呸呸呸，汝迄支喙哦！”“哈哈哈，袂啦！袂酵啦！今仔落雨秋凊天，拄好较好眠！无顶几日强卜热死！来哦，毋通七看八看，七想八想哦！蜡烛火歕熄通睏啰！”阿婧倒咧眠床顶，诚斟酌听外口的风雨声。嘉庆话说了无两秒钟已经鼾（huann5）甲大母细声。日时做穑伤碌，侬易厌仙。阿婧惦惦仔，看玻璃天窗的水流，看椽仔角枝传湿入来的雨水浸甲计澹去。厝顶迄逝小含脩（sau）的瓦片，雨水湿落来，嘀嘀嗒嗒（tauh8-tauh8）滴咧承水的面桶里。逐摆落雨，规厝内就咧排面桶阵！起厝的申请拍去偌久，就是毋批出来！便落雨，阿婧一粒心就捾咧，食袂落，睏袂落。
"呯……"
“庆啊！阿婧啊！恁嘛好侬好侬，应一声哦！毋通惊死阮哦！我苦啊！救侬哦！我苦啊……”“际卜障仔办啊？我苦啊！”“老查某啊，汝紧去叫厝边来相共搤！紧咧，紧去！雨衫幔去！”“嗯，我去。老的，汝家着较细腻！我苦啊……”两个老岁仔目屎流目屎滴一个那咧搤塗，一个那位外口行去。
古大厝靠路头即爿的大房厝瓦、椽仔角枝、塗渣，一堆诚悬。老岁仔家一个侬，大下 细下用手耙塗。毋敢用锄头，惊伤着侬。一久仔，厝边头尾计来斗相共，有气力的相斗搤侬，先生侬联系救护车，街政委员赶紧拍电话报街长知。“共恁说无，早着批传侬起啰，恁毋。际出代志看恁卜障办？”老岁仔惊心一下佫有岁咧，骹计软落去，坐咧厝埕石砛鼿（puh）薰，一双手揤咧抖。老查某传厝边老姆牵咧，徛咧塗堆边仔喊。
阿婧先搤出来，手敽肋骨计折，好得伊手骨位面遮咧，鼻、喙窒较少塗。嘉庆搤出来的时阵已经直马马啰，规喙规鼻窒甲滇滇的塗糜膏，规身的骨头佫较免说啰。
……
“姑啊，姑啊，汝咧酵？”“姑啊，醒一下！”阿婧目睭裭开，“姑啊，汝卜惊死侬啰！”阿伦提面纸共阿婧面咧的目屎拭捒：“姑啊，毋通吼啰。”阿婧面挲一下，举头戆戆看厝顶，厝顶有一条幼幼的裂痕，正对沙发椅顶。
外口雨犹咧落……
6
阿婧穿一领浅蓝色纱质吊带衫连裙the咧房里的摇椅顶头轻轻仔摇，白色的百叶窗外口，几偌只雀仔伫云杉树顶浞（tshiok8）来浞去，柴桌顶头的收音机放的是江蕙的《家后》。厅里，萍仔嫂一括姊妹伴来厝内煮食化仙。阿婧覕咧房里听亻因标甲大母细声，就是毋爱出去敽亻因交陪。说毋捌亻因也毋是。萍仔嫂嫁来的时阵，阿婧犹咧读初中尔，伊即括姊妹伴经常来厝内佚佗，说来嘛是看家已大汉的，特别是迄个清芬姊诚疼家已的。毋久家已为啥乜就是毋爱出去敽亻因做阵化仙讲古？为啥乜家已无半个啥乜话计说的姊妹伴？是家已较孤死霜？阿婧但知影，佫较天大的代志，家已嘛囥咧，目屎吞落腹，也袂去共别侬说。想到即位，阿婧足百起来，褪赤骹行去徛咧窗仔骹。衫连裙伤长，差一丝仔拖咧塗骹。
“阿婧啊，水煮活鱼熟啰，出来食哦！”是清芬姊咧喊！阿婧揞（ann3）落去裙骹搝起来，赶紧跳起去摇椅，巴脊向门，目睭瞌瞌倒咧。
“硞硞硞……”“阿婧啊，出来食哦！”
“无做声？敢是咧睏？”
“汝共鱼贮起来，我入去看觅咧。”
阿萍轻轻仔将房门捒开，看阿婧倒咧摇椅顶头，越头共房门㧁（khah）咧，行到阿婧后壁，伸手共阿婧头壳捋一下：“阿婧，起来，通出去食！”阿婧翻头：“阿嫂，我毋爱食！”“毋食袂做得。佫较障仔，路嘛着照行，糜（mai）嘛着照食！乖，起来，头毛捋捋咧。”
阿萍共阿婧梳一个髻，佫位桌头的白瓷碟仔里摕两蕊天光早位楼骹挽的鸡卵花插咧阿婧髻里，鸡卵花的鹅黄配长裙的蓝，诚媠诚醒喙。阿萍看甲诚合意，共阿婧面挲一下：“阮阿婧就是媠！行，出来去！”
“来来来，趁烧紧来食！凊就无好食啰！”清芬姊无闲嘁嘁，赶紧共阿婧捀碗揭箸：“内面诚济菜咧，着夹起来食！”阿婧笑笑当做应伊。
侬伤济，逐个偂坐坐咧塗骹，围咧茶桌食。“妈妈啊，阿婧姨姨的裙仔诚媠哦，我也卜挃。”少红的查某仔成十岁额，已经大到若少女尔啰，铰一个童发头，诚清气相诚古锥。迄个无去的若犹伫咧，嘛有即个岁啰。阿婧想到即，目屎煞挡袂牢流落来。“阿婧，酵代啊？”“无啦！鱼伤辣啦！歹势。”阿婧笑笑，摕面纸将目屎拭捒。
海骹的暗时，风微微仔吹来，澹澹佫臭臊。阿婧头毛放落来，穿嘉庆早时买的迄领白色带绿色碎花吊带长纱裙the咧客栈二楼五骹架的交椅里。桌仔顶头白瓷杯内面几箬仔绿茶浮咧沉咧。客栈的音箱咧放《永远追随》。
嘉庆过身后，阿婧出院了偂搬倒来外家厝蹛，规日覕咧房里毋爱见侬。厝内的代志计阿兄去发落。厝倒了，袂蹛咧，本在卜共公婆接来外家厝蹛，毋久老岁仔毋爱，惊麻烦阿婧外家厝的侬，说凊采蹛咧厝边就好。阿练就近租一位所在传两个老岁仔蹛，三不五时买一下欠用的物件过去看亻因。起厝的代，着等嘉庆三年过了则会做动土得！所以，到今也则起一个框架尔。阿练叫阿婧免烦恼拽代志，好好位厝内养身体就好。起厝的代志伊去发落就会做得啰。
身体好交囵了，诚久无出来行行咧啰。
透早起来，阿婧共阿萍说伊卜出去几日，四界行行云云咧。阿萍欢喜甲，说好！阿婧换一身白纱衫佮蓝色长牛仔裙、白球鞋，昨暝抾好的衫裤物件捾咧，去动车站坐车。“放较宽心咧！佫较艰苦，路咱嘛着继续行落去……”阿婧想着阿萍临卜行对伊说的话，笑笑，对路头行去，愈行愈远……
